ನಂಜನಗೂಡು, ಡಿಸೆಂಬರ್ 22, 2025 : ದಕ್ಷಿಣ ಕಾಶಿಯ ಪುಣ್ಯಕ್ಷೇತ್ರ ನಂಜನಗೂಡಿನ ಕಪಿಲಾ ನದಿ ತೀರವು ಭಾನುವಾರ ಸಂಜೆ ಅತ್ಯಂತ ವೈಭವದ ಲಕ್ಷ ದೀಪೋತ್ಸವ ಹಾಗೂ ಕಪಿಲಾ ಆರತಿ ಕಾರ್ಯಕ್ರಮಕ್ಕೆ ಸಾಕ್ಷಿಯಾಯಿತು. ಕಳೆದ ಹತ್ತು ವರ್ಷಗಳಿಂದ ಯುವ ಬ್ರಿಗೇಡ್ ಸಂಘಟನೆಯು ನಡೆಸಿಕೊಂಡು ಬರುತ್ತಿರುವ ಈ ವಿಶಿಷ್ಟ ಪರಂಪರೆಯು ಈ ಬಾರಿಯೂ ಅತ್ಯಂತ ಶ್ರದ್ಧಾ ಭಕ್ತಿಯಿಂದ ನೆರವೇರಿತು. ಕಾರ್ಯಕ್ರಮದ ಆರಂಭಕ್ಕೂ ಮುನ್ನ ಯುವ ಬ್ರಿಗೇಡ್ನ ಕಾರ್ಯಕರ್ತರು ಕಪಿಲಾ ನದಿಯನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ, ನಂತರ ಈ ಧಾರ್ಮಿಕ ಉತ್ಸವಕ್ಕೆ ಚಾಲನೆ ನೀಡಿದರು.
ನದಿಯ ತಟದಲ್ಲಿರುವ ಐತಿಹಾಸಿಕ ಹದಿನಾರು ಕಾಲು ಮಂಟಪದಲ್ಲಿ ಪ್ರತಿಷ್ಠಾಪಿಸಲಾಗಿದ್ದ ಶಿವಲಿಂಗಕ್ಕೆ ಅಷ್ಟತೀರ್ಥಗಳ ಅಭಿಷೇಕ ಮಾಡುವ ಮೂಲಕ ಕಾರ್ಯಕ್ರಮವನ್ನು ಉದ್ಘಾಟಿಸಲಾಯಿತು. ಈ ಪವಿತ್ರ ಕಾರ್ಯಕ್ರಮದಲ್ಲಿ ರಾಮಕೃಷ್ಣ ಆಶ್ರಮದ ಶ್ರೀ ಸರ್ವಜಯಾನಂದಜೀ ಸ್ವಾಮೀಜಿ, ಶ್ರೀ ಪ್ರಮಥಾದೀಪಾನಂದಜೀ ಹಾಗೂ ಗೋಪಾಲ್ ಜೀ ಅವರು ಭಾಗವಹಿಸಿ ಭಕ್ತಾದಿಗಳಿಗೆ ಮಾರ್ಗದರ್ಶನ ನೀಡಿದರು.
ಸ್ನಾನಘಟ್ಟದ ಉದ್ದಕ್ಕೂ ಸಾವಿರಾರು ಭಕ್ತರು ಸಾಲು ಸಾಲಾಗಿ ಹಚ್ಚಿದ್ದ ಲಕ್ಷಾಂತರ ದೀಪಗಳ ಬೆಳಕು ಕಪಿಲಾ ನದಿಯ ಒಡಲಿನಲ್ಲಿ ಪ್ರತಿಫಲಿಸುತ್ತಾ ಭವ್ಯವಾದ ದೃಶ್ಯವನ್ನು ಸೃಷ್ಟಿಸಿತ್ತು. ಮಂತ್ರಘೋಷಗಳ ನಡುವೆ ನಡೆದ ಮಹಾ ಆರತಿಯನ್ನು ನದಿ ದಂಡೆಯ ಮೇಲೆ ಕುಳಿತಿದ್ದ ಸಾವಿರಾರು ಪ್ರೇಕ್ಷಕರು ಅತ್ಯಂತ ಭಕ್ತಿಪೂರ್ವಕವಾಗಿ ಕಣ್ತುಂಬಿಕೊಂಡರು. ನದಿ ಮೂಲವನ್ನು ಪೂಜಿಸುವ ಮತ್ತು ಪರಿಸರ ಸಂರಕ್ಷಣೆಯ ಸಂದೇಶ ಸಾರುವ ಈ ಕಪಿಲಾ ಆರತಿಯು ಇಡೀ ನಂಜನಗೂಡಿನಲ್ಲಿ ಹಬ್ಬದ ವಾತಾವರಣವನ್ನು ನಿರ್ಮಿಸಿತ್ತು.