ಮೈಸೂರು, ಅಕ್ಟೋಬರ್ 8: ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವಕ್ಕೆ ಮತ್ತಷ್ಟು ಮೆರುಗು ನೀಡಲು ಈ ಬಾರಿ 3,500ಕ್ಕೂ ಹೆಚ್ಚು ಡ್ರೋನ್‌ಗಳ ಭರ್ಜರಿ ಪ್ರದರ್ಶನಕ್ಕೆ ಸಿದ್ಧತೆ ನಡೆದಿದೆ. ಆಕಾಶವನ್ನೇ ಕ್ಯಾನ್ವಾಸ್ ಮಾಡಿಕೊಂಡು ಎಲ್‌ಇಡಿ ದೀಪಗಳನ್ನು ಅಳವಡಿಸಿರುವ ಡ್ರೋನ್‌ಗಳ ಮೂಲಕ ಬೃಹತ್ ನವಿಲಿನ ಆಕೃತಿ ಮೂಡಿಸಿ ಗಿನ್ನೆಸ್ ವಿಶ್ವ ದಾಖಲೆ ನಿರ್ಮಿಸುವ ಗುರಿ ಹೊಂದಲಾಗಿದೆ. ಚಾಮುಂಡೇಶ್ವರಿ ವಿದ್ಯುತ್ ಸರಬರಾಜು ನಿಗಮ (CESC) ಈ ಡ್ರೋನ್ ಶೋ ಆಯೋಜಿಸಲು ಸಿದ್ಧತೆ ನಡೆಸಿದೆ. ಸುಮಾರು 15 ನಿಮಿಷಗಳ ಕಾಲ ನಡೆಯಲಿರುವ ಪ್ರದರ್ಶನದಲ್ಲಿ 3,500ಕ್ಕೂ ಹೆಚ್ಚು ಡ್ರೋನ್‌ಗಳು ಹಾರಾಟ ನಡೆಸಲಿವೆ.
ಭಾರತದ ರಾಷ್ಟ್ರೀಯ ಪಕ್ಷಿ ನವಿಲಿನ ಬೃಹತ್ ಆಕೃತಿಯನ್ನು ಡ್ರೋನ್‌ಗಳ ಮೂಲಕ ಆಕಾಶದಲ್ಲಿ ಮೂಡಿಸುವ ಯೋಜನೆ ರೂಪಿಸಲಾಗಿದೆ. ಈ ಮೂಲಕ ಗಿನ್ನೆಸ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್‌ಗೆ ಸೇರುವ ಪ್ರಯತ್ನ ನಡೆಯಲಿದೆ. ಯೋಜನೆ ಬಗ್ಗೆ ಸರ್ಕಾರದ ಅನುಮೋದನೆಗಾಗಿ ಪ್ರಸ್ತಾವನೆ ಸಲ್ಲಿಸಲಾಗಿದೆ.
2023ರಲ್ಲೂ ಗಿನ್ನೆಸ್ ದಾಖಲೆ ಬರೆದಿದ್ದ ಡ್ರೋನ್ ಶೋ
2023ರಲ್ಲಿ 2,983 ಡ್ರೋನ್‌ಗಳನ್ನು ಬಳಸಿ ಆಕಾಶದಲ್ಲಿ ಬೃಹತ್ ಹುಲಿಯ ಆಕೃತಿ ಮೂಡಿಸಲಾಗಿತ್ತು. ಇದು ಮಲ್ಟಿರೋಟರ್‌/ಡ್ರೋನ್‌ಗಳ ಮೂಲಕ ನಿರ್ಮಿಸಲಾದ ಅತಿ ದೊಡ್ಡ ಸಸ್ತನಿ ಆಕಾಶ ಪ್ರದರ್ಶನ ಎಂಬ ಗಿನ್ನೆಸ್ ದಾಖಲೆಗೆ ಪಾತ್ರವಾಗಿತ್ತು. 2024ರಲ್ಲಿ ಬನ್ನಿಮಂಟಪದ ಟಾರ್ಚ್‌ಲೈಟ್ ಪರೇಡ್ ಮೈದಾನದಲ್ಲಿ 1,500 ಡ್ರೋನ್‌ಗಳ ಮೂಲಕ ಡ್ರೋನ್ ಶೋ ಆರಂಭಿಸಲಾಗಿತ್ತು. ಬಳಿಕ ಈ ಪ್ರದರ್ಶನ ಜನಪ್ರಿಯತೆ ಗಳಿಸಿದೆ.
ಈ ಬಾರಿಯ ಡ್ರೋನ್ ಶೋಗೆ ಸುಮಾರು ₹5 ಕೋಟಿ ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿದೆ. ಡ್ರೋನ್‌ಗಳ ಖರೀದಿ, ತಾಂತ್ರಿಕ ವ್ಯವಸ್ಥೆ, ಸಾಫ್ಟ್‌ವೇರ್, ನಿಯಂತ್ರಣ ವ್ಯವಸ್ಥೆ, ಸುರಕ್ಷತಾ ಕ್ರಮಗಳು ಹಾಗೂ ತಾಂತ್ರಿಕ ತಜ್ಞರ ವೆಚ್ಚ ಇದರಲ್ಲಿ ಸೇರಿದೆ. ಸರ್ಕಾರದ ಮೇಲಿನ ಆರ್ಥಿಕ ಹೊರೆಯನ್ನು ಕಡಿಮೆ ಮಾಡಲು ಖಾಸಗಿ ಪ್ರಾಯೋಜಕತ್ವ ಪಡೆಯುವ ಚಿಂತನೆಯೂ ಇದೆ ಎಂದು ಮೂಲಗಳನ್ನು ಉಲ್ಲೇಖಿಸಿ ‘ಡೆಕ್ಕನ್ ಹೆರಾಲ್ಡ್’ ವರದಿ ಮಾಡಿದೆ.
ಅ.17ರಿಂದ ನಾಲ್ಕು ದಿನ ಡ್ರೋನ್ ಶೋ
ದೆಹಲಿ ಮೂಲದ ಬೋಟ್ಲ್ಯಾಬ್ ಡೈನಾಮಿಕ್ಸ್ (Botlab Dynamics) ಸಂಸ್ಥೆಗೆ ಈ ಬಾರಿಯ ಡ್ರೋನ್ ಶೋ ಜವಾಬ್ದಾರಿ ವಹಿಸಲಾಗಿದೆ. 2023ರಲ್ಲಿ ಮೈಸೂರಿನಲ್ಲಿ ಬೃಹತ್ ಹುಲಿಯ ಆಕೃತಿ ಸೇರಿದಂತೆ ಸಂಕೀರ್ಣ 3D ವಿನ್ಯಾಸಗಳನ್ನು ಡ್ರೋನ್‌ಗಳ ಮೂಲಕ ನಿರ್ಮಿಸಿ ಗಿನ್ನೆಸ್ ದಾಖಲೆ ಮಾಡಿದ್ದ ಸಂಸ್ಥೆಯೇ ಈ ಬಾರಿ ಕೂಡ ಪ್ರದರ್ಶನ ನಡೆಸಲಿದೆ. ಕಳೆದ ವರ್ಷದ ಪ್ರದರ್ಶನದಲ್ಲಿ ಸೌರವ್ಯೂಹ, ವಿಶ್ವ ಭೂಪಟ, ಸೇನೆ, ನವಿಲು, ಹುಲಿ, ಡಾಲ್ಫಿನ್, ಹದ್ದು, ಶ್ರೀಕೃಷ್ಣನ ಕಾಳಿಂಗ ನೃತ್ಯ, ಅಂಬಾರಿ ಆನೆ, ಕರ್ನಾಟಕದ ನಕ್ಷೆ ಹಾಗೂ ಚಾಮುಂಡೇಶ್ವರಿ ಸೇರಿದಂತೆ ಹಲವು ಆಕೃತಿಗಳನ್ನು ಆಕಾಶದಲ್ಲಿ ಮೂಡಿಸಲಾಗಿತ್ತು. ಸುಮಾರು 4 ಕಿ.ಮೀ ವ್ಯಾಪ್ತಿಯಿಂದ ಡ್ರೋನ್ ಶೋ ವೀಕ್ಷಿಸಬಹುದಾಗಿದೆ.