ಮೈಸೂರು, ಜನವರಿ 29, 2026 : ಮೈಸೂರಿನ ಶ್ರೀ ಚಾಮರಾಜೇಂದ್ರ ಮೃಗಾಲಯದ ಅತ್ಯಂತ ಹಿರಿಯ ಜಿರಾಫೆಯಾದ ‘ಯುವರಾಜ’ ವಯೋಸಹಜ ಕಾರಣಗಳಿಂದಾಗಿ ಮೃತಪಟ್ಟಿದೆ. ಮೃಗಾಲಯದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿದ್ದ ಈ ಜಿರಾಫೆಯ ಸಾವು ಮೃಗಾಲಯದ ಸಿಬ್ಬಂದಿ ಹಾಗೂ ಪ್ರಾಣಿಪ್ರಿಯರಲ್ಲಿ ಬೇಸರ ಮೂಡಿಸಿದೆ.
ಸಾಮಾನ್ಯವಾಗಿ ಜಿರಾಫೆಗಳು ಕಾಡಿನಲ್ಲಿ ಅಥವಾ ಮೃಗಾಲಯದ ಪರಿಸರದಲ್ಲಿ 25 ವರ್ಷಗಳ ಕಾಲ ಬದುಕುವುದು ಅತ್ಯಂತ ವಿರಳವೆಂದು ಪರಿಗಣಿಸಲಾಗುತ್ತದೆ. ಆದರೆ, ಯುವರಾಜ ಅತಿ ಹೆಚ್ಚು ವರ್ಷ ಬದುಕಿದ ಜಿರಾಫೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿತ್ತು. ಕಳೆದ ಡಿಸೆಂಬರ್ 10ರಂದು ತನ್ನ 25ನೇ ವರ್ಷದ ಜನ್ಮದಿನವನ್ನು ಆಚರಿಸಿಕೊಂಡಿದ್ದ ಯುವರಾಜನಿಗೆ, ಮೃಗಾಲಯದ ಸಿಬ್ಬಂದಿ ವಿಶೇಷವಾದ ಕೇಕ್ ತಿನ್ನಿಸಿ ಸಂಭ್ರಮಾಚರಣೆ ಮಾಡಿದ್ದರು.
ಯುವರಾಜನ ಆರೋಗ್ಯದ ಬಗ್ಗೆ ಮೃಗಾಲಯದ ವೈದ್ಯಕೀಯ ತಂಡ ನಿರಂತರ ನಿಗಾ ವಹಿಸಿತ್ತಾದರೂ, ವಯೋಸಹಜ ದೌರ್ಬಲ್ಯದಿಂದಾಗಿ ಜಿರಾಫೆ ಸಾವನ್ನಪ್ಪಿದೆ ಎಂದು ಮೃಗಾಲಯದ ಮೂಲಗಳು ತಿಳಿಸಿವೆ. ಮೃಗಾಲಯದ ಇತಿಹಾಸದಲ್ಲಿ ಸುದೀರ್ಘ ಕಾಲ ಬದುಕಿದ ಜಿರಾಫೆಗಳಲ್ಲಿ ಯುವರಾಜ ಕೂಡ ಒಬ್ಬನಾಗಿ ನೆನಪಿನಲ್ಲಿ ಉಳಿಯಲಿದ್ದಾನೆ.