ಕಳೆದ ಎರಡು ವಾರಗಳಿಂದ ಬೆಳ್ಳುಳ್ಳಿ ದರ ಏರುಗತಿಯಲ್ಲಿದ್ದು, ಕೊಚ್ಚಿ, ಮಂಗಳೂರು ಮಾರುಕಟ್ಟೆಯಲ್ಲಿ ತ್ರಿಶತಕದತ್ತ ದಾಪುಗಾಲಿಡುತ್ತಿದೆ. ಬೆಳ್ಳುಳ್ಳಿಗೆ ಗುಣಮಟ್ಟಕ್ಕೆ ತಕ್ಕಂತೆ ಕೆಜಿಗೆ 280ರಿಂದ 300 ರೂಪಾಯಿ ಪಡೆಯಲಾಗುತ್ತಿದೆ. ರಾಜಧಾನಿ ಬೆಂಗಳೂರಿನಲ್ಲಿ ಉತ್ತಮ ದರ್ಜೆಯ ಬೆಳ್ಳುಳ್ಳಿ ದರ ಈಗಾಗಲೇ ಕೆಜಿಗೆ 400 ರೂ.ಗೆ ತಲುಪಿದ್ದು, ಸಾಧಾರಣ ಗುಣಮಟ್ಟದ ಬೆಳ್ಳುಳ್ಳಿಗೆ ಕೆಜಿಗೆ 240-320 ರೂಪಾಯಿ ದರವಿದೆ.
ಕೊಚ್ಚಿ, ಮಂಗಳೂರು ಮಾರುಕಟ್ಟೆಯಲ್ಲಿ ಬೆಳ್ಳುಳ್ಳಿ ದರ ತ್ರಿಶತಕದತ್ತ ದಾಪುಗಾಲಿಡುತ್ತಿದೆ. ಕಳೆದ ಎರಡು ವಾರಗಳಿಂದ ಏರುಗತಿಯಲ್ಲಿರುವ ಬೆಳ್ಳುಳ್ಳಿಗೆ ಗುಣಮಟ್ಟಕ್ಕೆ ತಕ್ಕಂತೆ 280ರಿಂದ 300 ರೂ. ಪಡೆಯಲಾಗುತ್ತಿದೆ. ಸೀಸನ್ ಮುಗಿದಿರುವುದು ಬೆಲೆಯೇರಿಕೆಗೆ ಕಾರಣ ಎಂದು ಹೇಳಲಾಗುತ್ತಿದೆ.
ಎರಡು ವಾರದ ಹಿಂದೆ ಚಿಲ್ಲರೆ ಅಂಗಡಿಗಳಲ್ಲಿ ಸಾಧಾರಣ ಗುಣಮಟ್ಟದ ಬೆಳ್ಳುಳ್ಳಿ 200 ರೂ.ಗೆ ಲಭಿಸುತ್ತಿದ್ದರೆ, ಪ್ರಸ್ತುತ 250 ರೂ.ಗೆ ಏರಿದೆ. ಬಳಕೆಗೆ ತಕ್ಕಂತೆ ಬೆಳ್ಳುಳ್ಳಿ ಉತ್ಪಾದನೆ ಇಲ್ಲದಿರುವುದು ಬೆಲೆ ಏರಿಕೆಗೆ ಕಾರಣವೆಂದು ವ್ಯಾಪಾರಿಗಳು ಹೇಳುತ್ತಿದ್ದಾರೆ. ಕೇರಳದಲ್ಲಿ ಬೆಳ್ಳುಳ್ಳಿ ಉತ್ಪಾದನೆ ಇಲ್ಲದ ಕಾರಣ ನೆರೆ ರಾಜ್ಯಗಳನ್ನು ಅವಲಂಬಿಸಿದೆ. ಹೆಚ್ಚಿನ ಬೆಳ್ಳುಳ್ಳಿ ತಮಿಳುನಾಡಿನಿಂದ ಆಮದಾಗುತ್ತಿದೆ. ಹವಾಮಾನ ವೈಪರೀತ್ಯವೂ ಈ ಬಾರಿ ಬೆಳ್ಳುಳ್ಳಿ ಕೃಷಿ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ.
ನವಂಬರ್ ಕೊನೆಯಲ್ಲಿ ಖರೀದಿಸಿದ್ದ ಬೆಳ್ಳುಳ್ಳಿ ದಾಸ್ತಾನಿದ್ದು, 280 ರೂ.ಗೆ ಮಾರಾಟ ಮಾಡಲಾಗುತ್ತಿದೆ. ಈ ವಾರ ಖರೀದಿ ದರ 280 ರೂ.ಗೆ ಏರಿಕೆಯಾಗಿದ್ದು ದಾಸ್ತಾನು ಮುಗಿದಲ್ಲಿ ಮಾರಾಟ ದರ 300 ರೂ. ತಲುಪಲಿದೆ ಎಂದಿದ್ದಾರೆ ಸ್ವರ್ಗದ ಎಂ.ಎಸ್. ಟ್ರೇಡರ್ಸ್ ಮಾಲೀಕ ರಕ್ಷಿತ್ ಸ್ವರ್ಗ.
ಈರುಳ್ಳಿ ಬೆಲೆ ಕುಸಿತ
ನಾಲ್ಕು ತಿಂಗಳ ಹಿಂದೆ ದ್ವಿಶತಕದತ್ತ ದಾಪುಗಾಲಿಟ್ಟಿದ್ದ ಈರುಳ್ಳಿ ಬೆಲೆ ಪ್ರಸ್ತುತ ಪ್ರತಿ ಕೆಜಿಗೆ 50 ರೂ.ಗೆ ಇಳಿದಿದೆ. ಜುಲೈನಲ್ಲಿ 90 ರೂ.ವರೆಗೆ ಏರಿದ್ದ ಬೆಲೆ ಎರಡು ವಾರಗಳ ಹಿಂದೆ 63 ರೂ.ಗೆ ಇಳಿದಿದೆ. ಪ್ರಸ್ತುತ ಸಗಟು ಬೆಲೆ ಮತ್ತೆ 10-13 ರೂ. ಇಳಿಕೆಯಾಗಿ 50ರಿಂದ 55 ರೂ.ಗೆ ಲಭಿಸುತ್ತಿದೆ. ಸಣ್ಣ ಈರುಳ್ಳಿ 40ರಿಂದ 45 ರೂ.ಗೆ ಲಭಿಸುತ್ತಿದೆ.
ಕೇರಳಕ್ಕೆ ಈರುಳ್ಳಿ ಮುಖ್ಯವಾಗಿ ತಮಿಳುನಾಡು, ಕರ್ನಾಟಕ ಹಾಗೂ ಆಂಧ್ರಪ್ರದೇಶದಿಂದ ಆಗಮಿಸುತ್ತಿದೆ. ತಮಿಳುನಾಡಿನ ಸಗಟು ವಿತರಣೆ ಮಾರುಕಟ್ಟೆಯಲ್ಲಿ ಈರುಳ್ಳಿ ಲಭ್ಯತೆ ಏರಿಕೆಯಾಗಿದೆ. ಜುಲೈ-ಆಗಸ್ಟ್ ಈರುಳ್ಳಿ ಕೊಯ್ಲಿನ ಸಮಯವಾಗಿದ್ದು ಹೊರ ರಾಜ್ಯಗಳಿಂದ ಅಗತ್ಯಕ್ಕೆ ತಕ್ಕ ಈರುಳ್ಳಿ ಬರಲಾರಂಭಿಸಿದೆ. ಮಾರುಕಟ್ಟೆಯಲ್ಲಿ ಹೊಸ ಮತ್ತು ಹಳೆಯ ಈರುಳ್ಳಿ ಲಭಿಸುತ್ತಿದೆ. ಹೆಚ್ಚು ದಿನ ಸಂಗ್ರಹಿಸಿಡಲಾಗದ ಈರುಳ್ಳಿ ಕೆಜಿಗೆ 42 ರೂ.ಗೆ ಲಭಿಸುತ್ತಿದ್ದರೆ, ಹಳೆಯ ಈರುಳ್ಳಿಗೆ 55 ರೂ. ನೀಡಬೇಕಾಗಿದೆ. ಮುಂದಿನ ದಿನಗಳಲ್ಲಿ ಈರುಳ್ಳಿ ಬೆಲೆ ಇನ್ನಷ್ಟು ಕಡಿಮೆಯಾಗುವ ಸಾಧ್ಯತೆಯಿದೆ.