ಮೈಸೂರು, ನವೆಂಬರ್ 20, 2025 : ‘ಫುಲ್ ಮೀಲ್ಸ್’ ಕನ್ನಡ ಚಲನಚಿತ್ರದಲ್ಲಿ ‘ಫೋಟೋಗ್ರಾಫರ್ಸ್ ಪ್ಲರ್ಟ್ಸ್’ (Photographers Flirts) ಎಂಬ ‘ಅಸಂಬದ್ಧ’ ಪದವನ್ನು ಬಳಸಲಾಗಿದೆ ಎಂದು ಆಕ್ಷೇಪಿಸಿ, ಮೈಸೂರು ಡಿಸ್ಟ್ರಿಕ್ಟ್ ಫೋಟೋಗ್ರಾಫರ್ಸ್ ಅಂಡ್ ವೀಡಿಯೋಗ್ರಾಫರ್ಸ್ ಅಸೋಸಿಯೇಷನ್ನ ಸದಸ್ಯರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಮೈಸೂರಿನ ಪತ್ರಕರ್ತರ ಭವನದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಚಿತ್ರತಂಡ ಮತ್ತು ಅಸೋಸಿಯೇಷನ್ ಸದಸ್ಯರ ನಡುವೆ ವಾಗ್ವಾದ ನಡೆದು, ಅಂತಿಮವಾಗಿ ಚಿತ್ರತಂಡ ಕ್ಷಮೆಯಾಚಿಸಿದೆ.
ಮೈಸೂರು ಡಿಸ್ಟ್ರಿಕ್ಟ್ ಫೋಟೋಗ್ರಾಫರ್ಸ್ ಅಂಡ್ ವೀಡಿಯೋಗ್ರಾಫರ್ಸ್ ಅಸೋಸಿಯೇಷನ್ನ ವತಿಯಿಂದ ನಡೆದ ಸುದ್ದಿಗೋಷ್ಠಿಯಲ್ಲಿ ಪ್ರಮುಖರು ಮಾತನಾಡಿದರು. ಚಲನಚಿತ್ರದಲ್ಲಿ ‘ಫೋಟೋಗ್ರಾಫರ್ಸ್ ಪ್ಲರ್ಟ್ಸ್’ ಎಂಬ ಪದವನ್ನು ಬಳಸಿದ್ದು, ಇದು ಛಾಯಾಗ್ರಾಹಕರಿಗೆ ನೇರ ಅಪಮಾನ ಮಾಡಿದಂತಿದೆ. ಇಂತಹ ಅಸಂಬದ್ಧ ಪದ ಬಳಕೆಯಿಂದ ಸಮಾಜದಲ್ಲಿ ಫೋಟೋಗ್ರಾಫರ್ಗಳ ಬಗ್ಗೆ ತಪ್ಪು ಭಾವನೆ ಮೂಡುತ್ತದೆ. ಆಕ್ಷೇಪಾರ್ಹ ಪದವನ್ನು ಚಿತ್ರದಿಂದ ಸಂಪೂರ್ಣವಾಗಿ ತೆಗೆದು ಹಾಕಿದ ನಂತರವೇ ಚಿತ್ರವನ್ನು ಬಿಡುಗಡೆ ಮಾಡಬೇಕು. ಇಲ್ಲದಿದ್ದರೆ, ಚಿತ್ರ ಬಿಡುಗಡೆಯಾಗುವ ಮಂದಿರಗಳ ಬಳಿ ಪ್ರತಿಭಟನೆ ನಡೆಸುವುದಾಗಿ ಎಚ್ಚರಿಕೆ ನೀಡಿದರು.
ಇದಕ್ಕೆ ಪ್ರತಿಯಾಗಿ, ಸುದ್ದಿಗೋಷ್ಠಿಯಲ್ಲಿದ್ದ ‘ಫುಲ್ ಮೀಲ್ಸ್’ ಚಲನಚಿತ್ರದ ನಿರ್ದೇಶಕ ಎನ್. ವಿನಾಯಕ್ ಅವರು ಸ್ಪಷ್ಟನೆ ನೀಡಿದರು. ಇಡೀ ಚಿತ್ರವು ಫೋಟೋಗ್ರಾಫರ್ಗಳ ಕುರಿತಾಗಿಯೇ ಮೂಡಿಬಂದಿದೆ. ‘ಫೋಟೋಗ್ರಾಫರ್ಸ್ ಪ್ಲರ್ಟ್ಸ್’ ಎಂಬ ಪದವನ್ನು ಕೇವಲ ಸಂದರ್ಭಕ್ಕೆ ಹಾಗೂ ಚಿತ್ರಕತೆಗೆ ತಕ್ಕಂತೆ ಬಳಸಲಾಗಿದೆಯೇ ಹೊರತು, ಛಾಯಾಗ್ರಾಹಕರಿಗೆ ಅಪಮಾನ ಮಾಡುವ ಯಾವುದೇ ಸನ್ನಿವೇಶಗಳು ಚಿತ್ರದಲ್ಲಿ ಇಲ್ಲ ಎಂದು ತಿಳಿಸಿದರು. ಈ ವೇಳೆ ಚಿತ್ರದ ನಾಯಕ ನಟ ಲಿಖಿತ್ ಶೆಟ್ಟಿ, ನಾಯಕಿಯರಾದ ಖುಷಿ ರವಿ ಮತ್ತು ತೇಜಸ್ವಿನಿ ಶರ್ಮಾ ಸಹ ಉಪಸ್ಥಿತರಿದ್ದರು.
ಕೊನೆಗೆ ಕ್ಷಮೆಯಾಚಿಸಿದ ತಂಡ
ಸುದ್ದಿಗೋಷ್ಠಿ ಮುಗಿದ ಬಳಿಕ, ಪತ್ರಕರ್ತರ ಭವನದ ಬಳಿಯೇ ಮೈಸೂರು ಡಿಸ್ಟ್ರಿಕ್ಟ್ ಫೋಟೋಗ್ರಾಫರ್ಸ್ ಅಂಡ್ ವೀಡಿಯೋಗ್ರಾಫರ್ಸ್ ಅಸೋಸಿಯೇಷನ್ನ ಸದಸ್ಯರು ಮತ್ತು ‘ಫುಲ್ ಮೀಲ್ಸ್’ ಚಿತ್ರತಂಡದ ಸದಸ್ಯರ ನಡುವೆ ಮಾತಿನ ಚಕಮಕಿ ನಡೆಯಿತು.ಛಾಯಾಗ್ರಾಹಕರು ಮತ್ತು ವಿಡಿಯೋಗ್ರಾಫರ್ಗಳು ಚಿತ್ರತಂಡದ ಸದಸ್ಯರನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡರು ಮತ್ತು ಆಕ್ಷೇಪಾರ್ಹ ಪದದ ಬಳಕೆಗೆ ಆಕ್ಷೇಪ ವ್ಯಕ್ತಪಡಿಸಿದರು.ಪರಿಸ್ಥಿತಿ ಬಿಗಡಾಯಿಸುತ್ತಿದ್ದಂತೆ, ‘ಫುಲ್ ಮೀಲ್ಸ್’ ಚಿತ್ರ ತಂಡದ ಸದಸ್ಯರು ಅಸೋಸಿಯೇಷನ್ನ ಸದಸ್ಯರ ಬಳಿ ಕ್ಷಮೆಯಾಚಿಸಿದರು. ಈ ಘಟನೆಯಿಂದಾಗಿ ಚಲನಚಿತ್ರದ ಬಿಡುಗಡೆಗೂ ಮುನ್ನವೇ ವಿವಾದ ಸೃಷ್ಟಿಯಾಗಿದೆ.