ಶ್ರೀಹರಿಕೋಟ, ಡಿಸೆಂಬರ್ 24, 2025 : ಭಾರತೀಯ ಬಾಹ್ಯಾಕಾಶ ಸಂಸ್ಥೆ ಇಸ್ರೋ, ತನ್ನ ಶಕ್ತಿಶಾಲಿ LVM3 (ಬಾಹುಬಲಿ) ರಾಕೆಟ್ ಮೂಲಕ ಅಮೆರಿಕದ ಬ್ಲೂಬರ್ಡ್ ಬ್ಲಾಕ್-2 ಉಪಗ್ರಹವನ್ನು ಯಶಸ್ವಿಯಾಗಿ ಕಕ್ಷೆಗೆ ಸೇರಿಸುವ ಮೂಲಕ ಐತಿಹಾಸಿಕ ಸಾಧನೆ ಮಾಡಿದೆ. ಇಸ್ರೋದ ವಾಣಿಜ್ಯ ವಿಭಾಗವಾದ NSIL ಮತ್ತು AST ಸ್ಪೇಸ್ಮೊಬೈಲ್ ನಡುವಿನ ಒಪ್ಪಂದದ ಅಡಿಯಲ್ಲಿ ನಡೆದ ಈ ಕಾರ್ಯಾಚರಣೆಯು ಭಾರತದ ನೆಲದಿಂದ ಉಡಾವಣೆಯಾದ ಅತ್ಯಂತ ಭಾರವಾದ ಪೇಲೋಡ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಸುಮಾರು 6100 ಕೆಜಿ ತೂಕವಿರುವ ಈ ಉಪಗ್ರಹವನ್ನು ಹೊತ್ತ ರಾಕೆಟ್, ಶ್ರೀಹರಿಕೋಟಾದಿಂದ ಬೆಳಿಗ್ಗೆ 8:55ಕ್ಕೆ ಉಡಾವಣೆಗೊಂಡು, ಕೇವಲ 15 ನಿಮಿಷಗಳಲ್ಲಿ 520 ಕಿ.ಮೀ ಎತ್ತರದ ಉದ್ದೇಶಿತ ಕಕ್ಷೆಯನ್ನು ತಲುಪಿತು. ಈ ಉಪಗ್ರಹದ ತಾಂತ್ರಿಕ ಸಾಮರ್ಥ್ಯವು ಅತ್ಯಂತ ವಿಶಿಷ್ಟವಾಗಿದ್ದು, ಇದು 223 ಚದರ ಮೀಟರ್ ವಿಸ್ತೀರ್ಣದ ಬೃಹತ್ ಆಂಟೆನಾವನ್ನು ಹೊಂದಿದೆ. ಮಸ್ಕ್ನ ಸ್ಟಾರ್ಲಿಂಕ್ ಅಥವಾ ಒನ್ವೆಬ್ನಂತಹ ಸೇವೆಗಳಿಗೆ ಮನೆಯಲ್ಲಿ ಪ್ರತ್ಯೇಕ ಆಂಟೆನಾಗಳ ಅಗತ್ಯವಿರುತ್ತದೆ, ಆದರೆ ಈ ಬ್ಲೂಬರ್ಡ್ ಉಪಗ್ರಹವು ಯಾವುದೇ ವಿಶೇಷ ಉಪಕರಣಗಳಿಲ್ಲದೆ ನೇರವಾಗಿ ಸಾಮಾನ್ಯ ಸ್ಮಾರ್ಟ್ಫೋನ್ಗಳಿಗೆ 4G ಮತ್ತು 5G ನೆಟ್ವರ್ಕ್ ಒದಗಿಸುತ್ತದೆ. ಇದರಿಂದಾಗಿ ದುರ್ಗಮ ಪ್ರದೇಶಗಳು ಮತ್ತು ವಿಪತ್ತು ಪೀಡಿತ ವಲಯಗಳಲ್ಲಿ ಸುಲಭವಾಗಿ ಧ್ವನಿ ಕರೆ ಮತ್ತು ಹೈ-ಸ್ಪೀಡ್ ಇಂಟರ್ನೆಟ್ ಸೌಲಭ್ಯ ಪಡೆಯಲು ಸಾಧ್ಯವಾಗುತ್ತದೆ.
ಈ ಯಶಸ್ವೀ ಕಾರ್ಯಾಚರಣೆಯನ್ನು ಪ್ರಧಾನಿ ಮೋದಿ ಅವರು ಭಾರತದ ಬಾಹ್ಯಾಕಾಶ ಕ್ಷೇತ್ರದ ಮಹತ್ವದ ಮೈಲಿಗಲ್ಲು ಎಂದು ಶ್ಲಾಘಿಸಿದ್ದಾರೆ. ಚಂದ್ರಯಾನ-2 ಮತ್ತು ಚಂದ್ರಯಾನ-3 ರಂತಹ ಯಶಸ್ವಿ ಯೋಜನೆಗಳಲ್ಲಿ ಬಳಕೆಯಾದ LVM3 ರಾಕೆಟ್, ಈಗ ವಾಣಿಜ್ಯ ಕ್ಷೇತ್ರದಲ್ಲೂ ತನ್ನ ಪಾರಮ್ಯವನ್ನು ಮೆರೆದಿದೆ. ಇಸ್ರೋ ವಿಜ್ಞಾನಿಗಳ ಈ ಅಪ್ರತಿಮ ಸಾಧನೆಯು ಜಾಗತಿಕ ವಾಣಿಜ್ಯ ಬಾಹ್ಯಾಕಾಶ ಮಾರುಕಟ್ಟೆಯಲ್ಲಿ ಭಾರತದ ಸ್ಥಾನಮಾನವನ್ನು ಮತ್ತಷ್ಟು ಎತ್ತರಕ್ಕೇರಿಸಿದೆ.