ಮೈಸೂರಿನಲ್ಲಿ ಟಿಟಿ ವಾಹನದ ಮೇಲೆ ಬಿದ್ದ ದೀಪಾಲಂಕಾರದ ಕಟೌಟ್: ತಪ್ಪಿದ ಭಾರಿ ಅನಾಹುತ!

ಮೈಸೂರು, ಅಕ್ಟೋಬರ್ 03: ಮೈಸೂರು ದಸರಾ ಮಹೋತ್ಸವದ ಆರಂಭದಲ್ಲೇ ನಗರದ ಗನ್ ಹೌಸ್ ವೃತ್ತದ ಬಳಿ ವಿದ್ಯುತ್ ದೀಪಾಲಂಕಾರದ ಬೃಹತ್ ಲೈಟ್ ಕಟೌಟ್ ಏಕಾಏಕಿ ಮುರಿದು ಬಿದ್ದು ಭಾರಿ ಅನಾಹುತವೊಂದು ತಪ್ಪಿದೆ. ವಿದ್ಯಾರ್ಥಿಗಳನ್ನು ಕರೆದೊಯ್ಯಲು ನಿಂತಿದ್ದ ಟಿಟಿ (TT) ವಾಹನದ ಮೇಲೆ ಕಟೌಟ್ ಬಿದ್ದಿದ್ದು, ವಾಹನದ ಚಾಲಕ ಹಾಗೂ ಆಸುಪಾಸಿನಲ್ಲಿದ್ದ ಸಾರ್ವಜನಿಕರು ಓಡಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಬೃಹತ್ ಕಟೌಟ್ ನಿಲ್ಲಿಸಲು ಕೇವಲ ಅರ್ಧ ಅಡಿ ಹಳ್ಳ ತೆಗೆದು ಕಂಬ ಹಾಕಿದ್ದ ಗುತ್ತಿಗೆದಾರರ ಬೇಜವಾಬ್ದಾರಿ ವರ್ತನೆ ವಿರುದ್ಧ ಸಾರ್ವಜನಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕಟೌಟ್ ಅಳವಡಿಸಿದ ಕೆಲವೇ ಗಂಟೆಗಳಲ್ಲಿ ಈ ಅವಘಡ ಸಂಭವಿಸಿದೆ.