ಮೈಸೂರು, ಡಿಸೆಂಬರ್ 9, 2025 : ಪ್ರಸಿದ್ಧ ಚಾಮುಂಡೇಶ್ವರಿ ಬೆಟ್ಟದ ದರ್ಶನ ಮತ್ತು ವಿವಿಧ ಸೇವೆಗಳ ಶುಲ್ಕಗಳನ್ನು ರಾಜ್ಯ ಸರ್ಕಾರವು ಏಕಾಏಕಿ ಹೆಚ್ಚಳ ಮಾಡಿರುವುದನ್ನು ಖಂಡಿಸಿ ಮೈಸೂರಿನಲ್ಲಿಂದು ಪ್ರತಿಭಟನೆ ನಡೆಸಲಾಯಿತು.
ಚಾಮುಂಡಿ ಬೆಟ್ಟದ ದರ್ಶನ ಮತ್ತು ಪ್ರಸಾದಗಳ ದರ ಹೆಚ್ಚಳದಿಂದ ಭಕ್ತರಿಗೆ ಹೊರೆಯಾಗಿದ್ದು, ಹೆಚ್ಚಳವನ್ನು ಕೂಡಲೇ ಹಿಂಪಡೆಯುವಂತೆ ಆಗ್ರಹಿಸಿ ಕರ್ನಾಟಕ ಸೇನಾಪಡೆ ಸಂಘಟನೆಯ ವತಿಯಿಂದ ಪ್ರತಿಭಟನೆ ನಡೆಸಲಾಯಿತು.
ಮೈಸೂರಿನ ಹಳೆ ಜಿಲ್ಲಾಧಿಕಾರಿ ಕಚೇರಿ ಬಳಿ ನಡೆದ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದ ಸಂಘಟನೆಯ ಕಾರ್ಯಕರ್ತರು, “ದರ್ಶನದ ದರಗಳನ್ನು ಇಳಿಸುವುದರ ಬದಲು, ಸರ್ಕಾರವು ಎರಡು ಪಟ್ಟು ಹೆಚ್ಚಿಸಿರುವುದು ಖಂಡನೀಯ,” ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಬೆಟ್ಟದಲ್ಲಿ ಭಕ್ತಾದಿಗಳಿಗೆ ನೀಡುವ ಊಟದ ಪ್ರಸಾದದ ವ್ಯವಸ್ಥೆಯು ಸರಿಯಾಗಿಲ್ಲ ಎಂದು ಭಕ್ತರು ಹೇಳುತ್ತಿದ್ದು, ಇತ್ತ ಗಮನ ಹರಿಸದೆ ದರಗಳನ್ನು ಹೆಚ್ಚಿಸಿರುವುದು ಸರಿಯಲ್ಲ ಎಂದು ಪ್ರತಿಭಟನಾಕಾರರು ಕಿಡಿಕಾರಿದರು.
ಹೆಚ್ಚಳವಾಗಿರುವ ದರಗಳು:
-
ಪ್ರಸಾದದ ಲಾಡು ದರ: ₹15 ರಿಂದ ₹25 ಕ್ಕೆ ಹೆಚ್ಚಳ.
-
ಸಾಮಾನ್ಯ ದರ್ಶನ ದರ: ₹30 ರಿಂದ ₹50 ಕ್ಕೆ ಹೆಚ್ಚಳ.
-
ವಿಶೇಷ ದರ್ಶನ ದರ: ₹100 ಇದ್ದ ದರವನ್ನು ₹200 ಕ್ಕೆ ಹೆಚ್ಚಳ.
ಹೆಚ್ಚಳ ಮಾಡಿರುವ ದರಗಳನ್ನು ಸರ್ಕಾರವು ಕೂಡಲೇ ಹಿಂಪಡೆಯಬೇಕು ಎಂದು ಈ ಸಂದರ್ಭದಲ್ಲಿ ಸಂಘಟನೆ ಒತ್ತಾಯಿಸಿದೆ.