ಮೈಸೂರು , ಫೆಬ್ರವರಿ 14, 2026 :ಫೆಬ್ರವರಿ 15ರಂದು ಜಗತ್ತಿನಾದ್ಯಂತ ಮಹಾ ಶಿವರಾತ್ರಿ ಹಬ್ಬವನ್ನು ಸಡಗರದಿಂದ ಆಚರಿಸಲಾಗುತ್ತಿದ್ದು, ಈ ಹಿನ್ನೆಲೆಯಲ್ಲಿ ಮೈಸೂರು ಅರಮನೆ ಆವರಣದ ಪ್ರಸಿದ್ಧ ಶ್ರೀ ತ್ರಿಣೇಶ್ವರಸ್ವಾಮಿ ದೇಗುಲದಲ್ಲಿ ವಿಶೇಷ ಸಿದ್ಧತೆಗಳು ನಡೆದಿವೆ. ಈ ಐತಿಹಾಸಿಕ ದಿನದಂದು ದೇವಸ್ಥಾನದ ಮೂಲ ಶಿವಲಿಂಗಕ್ಕೆ ಅಲಂಕರಿಸಲಾಗುವ ಅತ್ಯಂತ ಬೆಲೆಬಾಳುವ ಚಿನ್ನದ ಕೊಳಗವನ್ನು (ಚಿನ್ನದ ಮುಖವಾಡ) ಜಿಲ್ಲಾಡಳಿತವು ಬಿಗಿ ಭದ್ರತೆಯಲ್ಲಿ ದೇವಸ್ಥಾನದ ಅರ್ಚಕರ ಸುಪರ್ದಿಗೆ ಹಸ್ತಾಂತರಿಸಿದೆ.
ವರ್ಷವಿಡೀ ಸರ್ಕಾರದ ಭದ್ರತಾ ಖಜಾನೆಯಲ್ಲಿ ಸುರಕ್ಷಿತವಾಗಿರುವ ಈ ಚಿನ್ನದ ಕೊಳಗವು ಬರೋಬ್ಬರಿ ಹನ್ನೊಂದು ಕೆಜಿ ತೂಕದ ಶುದ್ಧ ಚಿನ್ನದಿಂದ ನಿರ್ಮಿತವಾಗಿದೆ. ಇದಕ್ಕೆ ಸುದೀರ್ಘ ಇತಿಹಾಸವಿದ್ದು, ಅಂದಿನ ಆಳರಸರಾದ ಜಯಚಾಮರಾಜ ಒಡೆಯರ್ ಅವರು ತಮ್ಮ ಪುತ್ರ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್ ಅವರು ಜನಿಸಿದ ಸಂದರ್ಭದಲ್ಲಿ ಪುತ್ರ ಸಂತಾನ ಪ್ರಾಪ್ತಿಯಾದ ಸಂತಸಕ್ಕಾಗಿ ಹರಕೆಯ ರೂಪದಲ್ಲಿ ಈ ಚಿನ್ನದ ಕೊಳಗವನ್ನು ತ್ರಿಣೇಶ್ವರಸ್ವಾಮಿಗೆ ಅರ್ಪಿಸಿದ್ದರು.
ಕೇವಲ ಮಹಾಶಿವರಾತ್ರಿಯ ದಿನ ಮಾತ್ರ ದೇವರಿಗೆ ಈ ವಿಶೇಷ ಚಿನ್ನದ ಮುಖವಾಡವನ್ನು ಧರಿಸಲಾಗುತ್ತಿದ್ದು, ಆ ದಿನ ಪೂರ್ತಿ ವಿಶೇಷ ಪೂಜಾ ಕೈಂಕರ್ಯಗಳು ಜರುಗಲಿವೆ. ವರ್ಷಕ್ಕೊಮ್ಮೆ ಮಾತ್ರ ಲಭ್ಯವಾಗುವ ಈ ಅಪರೂಪದ ದರ್ಶನವನ್ನು ಕಣ್ತುಂಬಿಕೊಳ್ಳಲು ರಾಜ್ಯದ ಮೂಲೆ ಮೂಲೆಗಳಿಂದ ಸಾವಿರಾರು ಭಕ್ತರು ಆಗಮಿಸುವ ನಿರೀಕ್ಷೆಯಿದೆ. ಈ ಹಿನ್ನೆಲೆಯಲ್ಲಿ ಹಿರಿಯ ಅಧಿಕಾರಿಗಳು ಖಜಾನೆಯಿಂದ ತಂದ ಚಿನ್ನದ ಕೊಳಗವನ್ನು ದೇವಸ್ಥಾನದ ಪ್ರಧಾನ ಅರ್ಚಕರಿಗೆ ಹಸ್ತಾಂತರಿಸಿದ್ದು, ದೇವಸ್ಥಾನದ ಸುತ್ತಮುತ್ತಲೂ ಬಿಗಿ ಪೊಲೀಸ್ ಬಂದೋಬಸ್ತ್ ಕಲ್ಪಿಸಲಾಗಿದೆ.