ಸರಗೂರು, ನವೆಂಬರ್ 25, 2025 : ಕಳೆದ ಹಲವು ದಿನಗಳಿಂದ ಹಂಚೀಪುರ, ಸಾಗರೆ, ದೇವಲಾಪುರ ಗ್ರಾಮಸ್ಥರಿಗೆ ಆತಂಕ ಮೂಡಿಸಿದ್ದ ಮತ್ತೊಂದು ನರಭಕ್ಷಕ ಹುಲಿಯನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಯಶಸ್ವಿಯಾಗಿ ಸೆರೆಹಿಡಿದಿದ್ದಾರೆ. ಇದುವರೆಗೂ 16 ಹುಲಿಗಳನ್ನು ಸೆರೆ ಹಿಡಿದಿರುವ ಅರಣ್ಯ ಇಲಾಖೆಯ ಕಾರ್ಯಾಚರಣೆಗೆ ಈ ಮೂಲಕ ಮತ್ತೊಂದು ಯಶಸ್ಸು ಸಿಕ್ಕಂತಾಗಿದೆ.
ಇಂದು ಬೆಳಗಿನ ಜಾವ 4 ಗಂಟೆಯ ಸಮಯದಲ್ಲಿ ಹುಲಿ ಸೆರೆಯಾಗಿದೆ. ಹುಲಿ ಸೆರೆಯಾದ ಸ್ಥಳವು ದೇವಲಾಪುರ ಗ್ರಾಮದ ಅಳಗಂಚಿ ಅರಣ್ಯದಂಚಿನ ಜಮೀನು ಎಂದು ತಿಳಿದುಬಂದಿದೆ. ಈ ಗಂಡು ಹುಲಿಯು ಕಳೆದ ಹಲವು ದಿನಗಳಿಂದ ಹಂಚೀಪುರ, ಸಾಗರೆ, ದೇವಲಾಪುರ ಗ್ರಾಮಗಳ ಜಮೀನುಗಳ ಸುತ್ತಮುತ್ತ ಓಡಾಡುತ್ತಾ ರೈತರು ಮತ್ತು ಜಾನುವಾರುಗಳಿಗೆ ಆತಂಕ ಮೂಡಿಸಿತ್ತು. ಸೆರೆಯಾದ ಹುಲಿಯು ಗಂಡು ಹುಲಿ ಆಗಿದ್ದು, ವೈದ್ಯಕೀಯ ಪರೀಕ್ಷೆಗಳಿಗಾಗಿ ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸಲಾಗಿದೆ.
ಸತತ ಕಾರ್ಯಾಚರಣೆಯ ನಂತರ ಹುಲಿ ಸೆರೆಯಾದ ಹಿನ್ನೆಲೆಯಲ್ಲಿ, ಸ್ಥಳೀಯ ಗ್ರಾಮಸ್ಥರು ಮತ್ತು ರೈತರು ನಿಟ್ಟುಸಿರು ಬಿಟ್ಟಿದ್ದಾರೆ. ಹುಲಿಯ ಸೆರೆಯಿಂದಾಗಿ ಜಾನುವಾರು ಮತ್ತು ಬೆಳೆ ನಷ್ಟದ ಭೀತಿ ದೂರವಾಗಿದೆ ಎಂದು ಜನರು ಸಂತಸ ವ್ಯಕ್ತಪಡಿಸಿದ್ದಾರೆ.
ನಾಗರಹೊಳೆ ಅರಣ್ಯ ಪ್ರದೇಶದ ಸುತ್ತಮುತ್ತ ಜಮೀನುಗಳಿಗೆ ಪ್ರವೇಶಿಸುತ್ತಿದ್ದ ಹುಲಿಗಳನ್ನು ಸೆರೆ ಹಿಡಿಯುವಲ್ಲಿ ಅರಣ್ಯ ಇಲಾಖೆ ಸಿಬ್ಬಂದಿ ಸತತ ಯಶಸ್ಸು ಸಾಧಿಸುತ್ತಿದ್ದಾರೆ. ಈ ಹುಲಿಯನ್ನು ಸೇರಿಸಿ, ಅರಣ್ಯ ಇಲಾಖೆಯು ಇದುವರೆಗೂ ಒಟ್ಟು 16 ಹುಲಿಗಳನ್ನು ಸೆರೆ ಹಿಡಿದು ಸೂಕ್ತ ಸ್ಥಳಕ್ಕೆ ರವಾನಿಸಿದೆ.