ಪ್ರತಿನಿಧಿ ವರದಿ ಬಿರುನಾಣಿ
ಪಾಕೇರಿನಾಡ್ ಶ್ರೀ ಪುತ್ತ್ ಭಗವತಿ ದೇವರ ವಾರ್ಷಿಕ ಉತ್ಸವದಲ್ಲಿ ಗಂಡು ಹೆಣ್ಣಿನಂತೆ, ಹೆಣ್ಣು ಗಂಡಿನ ವೇಷ ತೊಟ್ಟು ಹರಕೆ ತೀರಿಸಿಕೊಂಡರು.
ಪೊಮ್ಮಂಗಲ ಹೆಸರಿನಲ್ಲಿ ನೆರವೇರಿದ ಆಚರಣೆಯಲ್ಲಿ ಗಂಡು ಮಗುವನ್ನು ಹೆಣ್ಣಿನಂತೆ ಸೀರೆ ತೊಡಿಸಿ, ಮದುವೆ ವಧುವಂತೆಯೂ, ಹೆಣ್ಣು ಮಗುವನ್ನು ಗಂಡಿನ ಕುಪ್ಯಚೇಲೆ, ಪೀಚೆಕತ್ತಿ, ಮಂಡೆತುಣಿ ತೊಡಿಸಿ ಕೊಡವ ವರನಂತೆ ದೇವರ ದರ್ಶನಕ್ಕೆ ಒಪ್ಪಿಸಲಾಯಿತು. ಮದುವೆ ಅಚರಣೆಯಂತೆ ಹರಕೆ ಸಲ್ಲಿಸಲಾಯಿತು.
ಮನೆಯಲ್ಲಿ ಸಾಂಪ್ರದಾಯಿಕ ಆಚರಣೆ ಬಳಿಕ ಮನೆಯಿಂದ ದುಡಿಕೊಟ್ಟ್ ಪಾಟ್ನೊಂದಿಗೆ ದೇವಸ್ಥಾನಕ್ಕೆ ಆಗಮಿಸಿ, ಹರಕೆ ಒಪ್ಪಿಸಲು ದೇವಸ್ಥಾನ ಸುತ್ತಾ ಪ್ರದಕ್ಷಿಣೆ ಹಾಕಲಾಯಿತು. ಹರಕೆ ಹೊತ್ತವರು ದೇವಿಗೆ ಹರಕೆ ಒಪ್ಪಿಸುವ ಪದ್ಧತಿ ನಡೆಸಲಾಯಿತು. ಚೂಚಂಬಲಿ, ಸಂಜೆ ದೇವರು ಹೊರ ಬಂದು ದೇವಸ್ಥಾನದ ಸುತ್ತ ಪ್ರದಕ್ಷಿಣೆ, ರಾತ್ರಿ ಪಳ್ಳಿ ಬೇಟೆ, ಮಹಾಮಂಗಳಾರತಿ ನೆರವೇರಿತು.
ಸುಮಾರು 700 ವರ್ಷಗಳ ಇತಿಹಾಸ ಹೊಂದಿರುವ ಸ್ಥಾನದಲ್ಲಿ ಕೊಡಿಮರ ನಿಲ್ಲಿಸುವ ಮೂಲಕ ಆರಂಭಗೊಂಡ ಉತ್ಸವದಲ್ಲಿ ವಿವಿಧ ಪೂಜಾ ಕೈಂಕರ್ಯ, ಸಾಂಪ್ರದಾಯಿಕ ಆಚರಣೆಗಳೊಂದಿಗೆ ಅತ್ಯಂತ ವಿಜೃಂಭಣೆಯಿಂದ ಜರುಗಿತು. ಮಹಾಪೂಜೆ, ತುಲಾಭಾರ ಸೇವೆ, ಮಹಾಮಂಗಳಾರತಿ, ತೀರ್ಥಪ್ರಸಾದ ವಿತರಣೆ, ಸಂಜೆ ದೇವರ ದರ್ಶನ, ಅವಭೃತ ಸ್ನಾನಕ್ಕೆ ಮೆರವಣಿಗೆಯ ಮೂಲಕ ಪರಕಟಗೇರಿ ಮುಖ್ಯ ರಸ್ತೆಯಲ್ಲಿ ಹೊಳೆಗೆ ಸಾಗಿ ದೇವಸ್ಥಾನಕ್ಕೆ ಆಗಮಿಸಿತು. ರಾತ್ರಿ ದೇವರ ನೃತ್ಯ ದರ್ಶನ, ವಸಂತ ಪೂಜಾ ಕೈಂಕರ್ಯದೊಂದಿಗೆ ಪ್ರಸಕ್ತ ಸಾಲಿನ ಉತ್ಸವ ಶ್ರದ್ಧಾಭಕ್ತಿಯಿಂದ ಸಂಪನ್ನಗೊಂಡಿತು.
ಫೋಟೋ 5 ಎಂಡಿಕೆ 04 ; ಬಿರುನಾಣಿ ಪುತ್ತ್ ಭಗವತಿ ದೇವಿಯ ವಾರ್ಷಿಕೋತ್ಸವದಲ್ಲಿ ಪೊಮ್ಮಂಗಲ ಹರಕೆ ಹೊತ್ತವರು.